Oom Kwaai Kallie praat: Hoofstroommedia en sensuur van waarheid.

VRYKLARING: Die sieninge en menings in hierdie artikel is dié van Oom Kwaai Kallie en verteenwoordig nie noodwendig die standpunte van Vryheid Media nie. Oom Kwaai Kallie is bekend vir sy ongefilterde, reguit benadering en sy uitsprake is uitsluitlik sy eie interpretasie van huidige gebeure.

Mense, ons het gesien hoe Oom Kwaai Kallie se woorde soos ‘n veldbrand versprei het (lees die vorige Oom Kallie artikel hier). Daarom het ons gedink dit is net reg om hom weer aan die woord te stel. Hy praat direk, sny deur die nonsens en sê dit soos dit is.

Oom Kwaai Kallie het alweer uitgekruip, en hierdie keer is sy fokus direk op die hoofstroommedia geskoei, en die regering wat probeer om enige opposisie stil te maak. Hou vas, hier gaan ons:

Wanneer het die slang tussen julle hoofstroommedia-redakteure ingesluip? Dis nou duideliker as ooit dat julle nie julle lesers se belange dien nie. Julle versprei valse, verdraaide en soms misleidende inligting, en die manier waarop julle nuus aan die publiek voorhou is onvanpas en manipulerend. Moenie met die verskoning kom dat julle neutraal is nie – julle is al meer as 25 jaar links, en dit wys.

Dis glashelder dat julle ‘n agenda dryf wat nie die realiteite van Afrikaners weerspieël nie. Dis die einste rede hoekom meer en meer mense hulle rug op julle keer. Ons sal nie stilbly oor die onderdrukking, die verdraaiing van feite en die konstante afmaak van Afrikaners as tweedehandse burgers nie. Julle probeer om die waarheid te versmoor en elke liewe keer faal julle, want die mense is nie so blind as wat julle dink nie.

Ons sien die subteks, ons lees tussen die lyne, en ons weet wie julle dien. Dis nie die gewone mense op straat nie – dis nie die families wat in die Karoo baklei om te oorleef nie, en dit is beslis nie die werkers wat elke dag in kantore, myne, plase en fabrieke hul hande vuil maak nie. Julle rapporteer nie oor hulle nie. Julle probeer hulle eerder stilmaak. Julle deel eerder ‘n globale siening in plaas daarvan om julle eie mense se harte te verstaan. Julle bly stil oor plaasboere en aanvalle, asof hulle nie bestaan nie, terwyl hierdie gemeenskappe daagliks in die kruisvuur staan.

Wanneer laas het julle ‘n politikus aangevat oor hul sieninge? Wanneer laas was julle by ‘n nuuskonferensie en het julle vrae gevra wat uitdagend is – vrae wat politici onrustig maak? Nee, julle skryf dit net neer asof dit die wet is. Julle hou julle hande skoon en laat die vuil werk oor aan die agenda wat julle dien.

Wat van al die organisasies wat sê hulle dien ons mense se belange? Wanneer laas het julle regtig by hulle gaan hoor wat hulle doen om die gemeenskap se stem te versterk? Of is julle te besig om hulle in dieselfde hoek as julle politieke base te verf?

En nou wil die regering selfs verder gaan – hulle wil hul sekuriteitsagentskappe gebruik om sogenaamde “desinformasie” te beheer. Dis nie net gevaarlik vir vryheid van spraak nie, maar dis ‘n direkte bedreiging vir enige persoon of groep wat dit waag om die narratief uit te daag. Wie besluit wat “desinformasie” is? Die einste mense wat politieke mag gebruik om hulle belange te beskerm?

En dan is daar die vreesaanjaende gedagte dat dieselfde mense wat hierdie reëls afdwing, dieselfde is wat geweld ignoreer en wegkyk wanneer aanvalle op boere en gemeenskappe plaasvind. Dieselfde mense wat hul oë sluit vir die korrupsie wat die land verswelg, maar vinnig is om hul hande op te steek wanneer hulle hul eie mag wil uitbrei.

Intussen maak hulle asof hulle niks daarmee te doen het nie. Hulle ontken enige skuld vir die land se verval en blameer eerder die mense wat hulle nie kan stilmaak nie. Hulle wil hê dat ons moet glo dat ons self die skuld dra vir ons ontevredenheid – dat ons te veeleisend is, dat ons nie verstaan nie, en dat ons eenvoudig nie aanpas by die nuwe “reëls” nie.

Vir die van julle wat steeds glo dat die hoofstroommedia ‘n onpartydige bron van inligting is, word dit tyd om die oogklappe af te haal. Hulle het lankal ophou probeer om regverdig te wees. Hulle agenda is glashelder. Die tyd van stilbly is verby.

Groete,

Oom Kwaai Kallie